Hvað er hægt að ráða við stór áföll á höfuðborgarsvæðinu?:
Áfallaþol höfuðborgarsvæðisins kortlagt
Yfirskrift skýrslunnar er Val og hönnun björgunartilfella fyrir höfuðborgarsvæðið og var hún tekin saman í framhaldi af gerð áhættugreiningar fyrir höfuðborgarsvæðið. Er áhættugreiningin skýrsla um undirbúning áhættumats sem út kom árið 2002. Að þessu sinni voru hönnuð björgunartilfelli fyrir nokkra af þeim áhættuflokkum sem komu fyrir í fyrri skýrslunni. Flokkarnir eru alls þrettán; efnaslys og mengunaróhöpp, eldgos, eldsvoðar, fjarskipti, fjöldasýkingar og farsóttir, geislavirkni, jarðskjálftar, ofanflóð, óeirðir og hryðjuverk, óveður, samgöngur og aðfærsla aðfanga, sjávarflóð og veitustofnanir, truflanir í rekstri.
Í lokaorðum skýrsluhöfunda kemur fram að frekari úrvinnsla þeirra björgunartilfella sem lögð eru fram í skýrslunni ætti að varpa skýrara ljósi á áfallaþol höfuðborgarsvæðisins. Gert er ráð fyrir að hvert björgunartilfelli fyrir sig verði sent í vinnslu til þeirra stjórnvalda og aðila sem koma eiga að hverju sinni. Starfshópurinn vonast til þess að hver aðili fari yfir sinn verkþátt og verði reiðubúinn að koma að gerð viðbragðsáætlana. Niðurstaðan ætti að gefa ágæta mynd af þeim viðbúnaði, tækjakosti og mannafla á svæðinu, sem tiltækur er til að takast á við hin ýmsu áföll sem geta dunið á íbúum höfuðborgarsvæðisins.
Þegar allir hlutaðeigandi aðilar hafa unnið viðbragðsáætlanir er gert ráð fyrir að haldin verði svokölluð skrifborðsæfing fyrir ákveðin björgunartilfelli. Jón Viðar Matthíasson telur að þessi allsherjaræfing gæti farið fram innan 1-3 ára ef allt gengur eftir.
Heimild:MBL
