Beint í efni

Hvað er óviðeigandi?

Neteinelti og deilingar á myndum í leyfisleysi er ekki í lagi. Það kallast stafrænt ofbeldi þegar ofbeldi er beitt gegnum síma, tölvu eða samfélagsmiðla. Ef þú lendir í hegðun á netinu sem er ekki í lagi, talaðu þá við einhvern fullorðinn sem þú treystir og fáðu hjálp.

Dæmi um óviðeigandi hluti

  • Að stríða eða leggja einhvern í einelti á netinu af því að hann sé öðruvísi.
  • Að skrifa særandi athugasemdir, til dæmis um útlit annarra.
  • Að deila eða hóta að deila nektarmyndum af öðrum án leyfis.
  • Fá sent kynferðislegar myndir eða skilaboð sem þú baðst ekki um.

Hér fyrir neðan eru ráð ef myndum af þér er deilt í leyfisleysi eða þér finnist brotið á þér á einhvern hátt á netinu. Brot geta verið misjöfn svo ekki er víst að öll ráðin gagnist þér.

  • Þetta er ekki þín sök. Margir sem lenda í að myndum af þeim er deilt í leyfisleysi upplifa skömm og að það sé þeim að kenna. En þú gerðir ekkert rangt, jafnvel þótt þú sendir myndina frá þér. Þú baðst ekki um að lenda í þessari stöðu.
  • Biddu um að eyða myndinni. Ef þetta er einhver sem þú þekkir, biddu viðkomandi um að eyða henni meðan þú sérð til. Ef þú þekkir ekki manneskjuna, skrifaðu til hennar. Segðu frá því að þetta sé ólöglegt og biddu um að myndinni verði eytt.
  • Athugaðu hverjir hafa getað séð myndina. Var henni deilt á síma vinar, í lokaðri grúppu á Facebook eða er hún sýnileg öllum á Instagram? Gúglaðu nafnið þitt til að sjá hvaða upplýsingar um þig eru sýnilegar á netinu.
  • Geymdu sönnunargögn. Taktu myndir eða skjáskot af myndum, vídeóum og texta sem tengjast þessu ef viðkomandi neitar að eyða efninu. Þá ertu með sönnunargögn fyrir því sem hefur gerst. Gott er að biðja einhvern fullorðinn eða vini um aðstoð við að safna sönnunargögnum. Hægt er að nota þau til að sanna brotið og tilkynna til samfélagsmiðla eða lögreglu.
  • Tilkynntu til samfélagsmiðla. Myndir geta fljótt dreifst um netið ef ein manneskja deilir þeim á sínum prófíl. Tilkynntu fljótt til samfélagsmiðla um óviðeigandi myndir. Mikilvægt er að útskýra ástæðuna fyrir af hverju eyða eigi myndinni, til dæmis að þetta sé brot á þínu persónulega lífi, einhver hafi útbúið falskan prófíl eða að nektarmyndin brjóti gegn reglum samfélagsmiðilsins.
  • Talaðu við einhvern fullorðinn. Það getur verið mjög erfitt eða vandræðalegt að segja öðrum frá. En vandamál verða auðveldari þegar maður segir einhverjum frá þeim upphátt og er ekki einn með þau. Þess vegna er mikilvægt að tala við einhvern fullorðinn sem þú treystir. Það er skylda foreldra þinna að hjálpa þér. Mundu að foreldrar voru líka einu sinni ung.

Neteinelti

Hjálpumst að við að stöðva neteinelti með því að kynna okkur hvernig það lítur út og hversu alvarlegar afleiðingar það getur haft.

Stafrænt kynferðisofbeldi

Stafrænt kynferðisofbeldi er til dæmis að sýna eða dreifa nektarmyndum af öðrum í leyfisleysi, senda óumbeðnar nektarmyndir og kynferðisleg skilaboð, þrýsta á aðra að senda sér kynferðislegar myndir, til dæmis með því að vilja borga pening fyrir þær, eða nota nektarmyndir til þess að hrella, hóta eða kúga peninga af öðrum.