Þegar þú hefur sagt frá

Barnavernd

Hjá barnavernd vinnur fólk við að hjálpa börnum og fjölskyldum til að passa að börnum líði vel og séu örugg.

Hvernig læturðu vita?

Það er nóg að tala við einhvern fullorðinn sem þú treystir. Samkvæmt lögum á fullorðið fólk að passa upp á börn og láta barnavernd vita ef eitthvað er að.

Þú getur alltaf hringt í 112 eða notað netspjallið. Fólkið þar lætur barnavernd vita.

Það er gott að vita að:

• þú þarft ekkert að skammast þín fyrir að láta fólkið hjá 112 eða barnavernd viti um það sem gerðist
• það sem kom fyrir þig hefur líka komið fyrir önnur börn og ungmenni
• þau verða ekki hissa þegar þau heyra af því sem gerðist hjá þér
• þau vilja passa að enginn sé að meiða þig eða láta þér líða illa
• þau vilja fá að vita ef þér líður illa

Lögreglan

Það er ekki bara barnavernd sem tekur við málinu þínu. Það eru líka lögreglan og lögfræðingur sem er kallaður réttargæslumaður. Allt þetta fólk vinnur saman. Þau tala við foreldra þína og rannsaka málið.

Hringt í lögreglu

Oft er lögreglan kölluð á staðinn vegna heimilisofbeldis. Kannski hefur einhver á heimilinu hringt eða einhver annar sem hefur látið lögregluna vita. Þegar lögreglan sér að ofbeldi á sér stað á heimili þar sem barn býr lætur hún alltaf barnavernd vita. Þá kemur manneskja frá barnavernd til að passa upp á þig og aðstoða fjölskylduna. Oftast er sá sem beitti ofbeldinu fjarlægður af heimilinu.

Lögreglan rannsakar

Lögreglan safnar saman alls konar upplýsingum um það sem hefur gerst. Til dæmis tala þau við foreldra þína og annað fólk sem gæti vitað eitthvað um málið. Ef þú ert 15 ára eða eldri talar lögreglan líka við þig en ef þú ert yngri er sérfræðingur hjá Barnahúsi sem talar við þig.

Þetta gerir lögreglan til að það sé hægt að sanna það sem gerðist.

Réttargæslumaður

Réttargæslumaður er lögfræðingur sem hjálpar þeim sem verða fyrir ofbeldi í gegnum réttarkerfið. Það þarf ekki að borga honum laun, heldur gerir ríkið það.