Hættustig er í gildi á Reykjanesi vegna jarðhræringa.
Það er mjög mikilvægt að segja frá því ef einhver er að láta þig gera eitthvað sem þú vilt ekki gera.
Hjá barnavernd vinnur fólk sem athugar hvort börnum líði ekki vel og hvort þau séu ekki örugg. Þess vegna vilja þau fá að vita ef þér líður illa. Einhver er kannski að láta þig gera eitthvað sem þú vilt ekki. Þá vill fólkið hjá barnavernd vita það.
Þú þarft ekki að tala við barnavernd, heldur er nóg að tala við einhvern fullorðinn sem þú treystir eða þú getur alltaf hringt í 112 eða notað netspjall. Fólkið þar lætur barnavernd vita.
Það er nóg að segja þetta við einhvern sem þú treystir.
Stundum fer fólk sem hefur orðið fyrir kynferðisofbeldi á sérstaka móttöku á sjúkrahúsinu. Hún er kölluð neyðarmóttaka fyrir þolendur kynferðisofbeldis. Svoleiðis móttökur eru í Reykjavík og á Akureyri.
Þar talar hjúkrunarfræðingur við þig og þið ákveðið saman hvað þú vilt gera. Á neyðarmóttökunum er meðal annars:
Ef þú ert í vafa hvort þú eigir að fara á neyðarmóttöku fyrir fórnarlömb kynferðisofbeldis, eða kannski heilsugæsluna, er hægt að hringja í 112 og fá leiðbeiningar.
Hér er hægt að lesa meira um móttökuna og hvað er gert í skoðun þar.
Ef einhver er að brjóta á þér á netinu er það alveg jafn alvarlegt brot. Hringdu í 112 eða notaðu netspjallið til að fá aðstoð.
Ekki „blokka“ gerandann á samfélagsmiðlum þó þig langi til þess. Þetta er erfitt en þess virði að reyna. Samskiptasaga ykkar er gögn í málinu ef þú ákveður að kæra en þau hverfa ef þú blokkar manneskju.
Það er ekki bara barnavernd sem tekur við málinu þínu. Það eru líka lögreglan og lögfræðingur sem er kallaður réttargæslumaður. Allt þetta fólk er í samstarfi. Þau eru svo í sambandi við foreldra þína eða forsjáraðila um hvað gerist.
Til að komast að því sem hefur gerst talar manneskja við þig í Barnahúsi. Barnahús er bara venjulegt hús og herbergið lítur út eins og mörg önnur herbergi sem þú hefur komið í. Þið eruð bara tvö eða tvær að tala saman. Það sem þið segið er tekið upp og ef málið þitt fer fyrir dóm þá er upptakan spiluð í réttarsalnum. Það eru Barnahús á Akureyri og í Reykjavík. Ef þú býrð annars staðar kemur manneskjan frá Barnahúsi til þín.
Fólkið sem vinnur í Barnahúsi hjálpar þér að líða betur. Það er barnavernd sem biður um að þú fáir meðferð í Barnahúsi. Þá tala þú og foreldrar þínir við sálfræðing sem hefur mikla reynslu af því að hjálpa börnum.
Stundum veit lögreglan fyrst af brotinu. Kannski hefur einhver látið lögregluna vita. Kannski hringdi einhver og bað hana að koma strax því eitthvað var að. Lögreglan lætur alltaf barnavernd vita ef þau vita um börn sem líður illa eða eru í hættu.
Fólkið hjá lögreglunni safnar saman alls konar upplýsingum um það sem gerðist. Til dæmis tala þau við vitni ef það eru einhver, tala við þann sem braut á þér og fleira. Þau gera þetta til þess að það sé hægt að sanna það sem gerðist.
Það er lögfræðingur sem hjálpar þér og foreldrum þínum. Þið þurfið ekki að borga honum laun, heldur gerir ríkið það.