Ég hef orðið fyrir kynferðisofbeldi (Leiðarvísir fyrir 14 ára og yngri)

Hvað er kynferðisofbeldi?

Það er kynferðisofbeldi þegar einhver fær þig til að gera eitthvað kynferðislegt sem þú vilt ekki gera eða gerir eitthvað við þig sem þú hefur ekki samþykkt.

Segðu alltaf frá.

Það er alltaf einhver sem getur hjálpað.

Meira: Kynferðisofbeldi gegn unglingum

Mundu:

• þú þarft ekkert að skammast þín fyrir að fólkið hjá 112 eða barnavernd viti um það sem gerðist
• það sem kom fyrir þig hefur komið fyrir önnur börn
• þau verða ekki hissa þegar þau heyra af því sem gerðist hjá þér
• þau vilja passa að enginn sé að neyða þig til að gera eitthvað sem þú vilt ekki
• þau vilja fá að vita ef þér líður illa

Hvað á ég að gera?

Segðu frá

Talaðu um það sem gerðist við einhvern sem þér finnst gott að tala við og þú treystir, til dæmis einhvern í fjölskyldunni.

Þú getur líka talað við:

• Skólahjúkrunarfræðinginn
• Kennarann þinn
• Þjálfarann þinn
• Starfsfólkið í félagsmiðstöðinni þinni

Svo er fullt af fólki sem þekkir þig ekki en vill hjálpa þér:

Sjúkt spjall

Nafnlaust netspjall fyrir ungmenni af öllum kynjum (yngri en 20 ára) til að ræða áhyggjur af samböndum, samskiptum eða ofbeldi.

Hjálparsími og netspjall 1717

Opið allan sólarhringinn. Þar er hægt að tala í trúnaði um hvað sem er.

Sími og netspjall 112.

Í gegnum 112 geturðu fengið ráðgjafa frá barnavernd eða félagsþjónustu sem veitir þér og fjölskyldunni þinni stuðning. Það þarf að gefa upp nafn en þú getur beðið um að enginn annar fái að vita það.

Barnavernd

Barnavernd hjálpar börnum og fjölskyldum þeirra. Þú getur talað við Barnavernd til að fá ráð og aðstoð.

Bergið headspace

Ókeypis stuðnings- og ráðgjafasetur sem aðstoðar ungt fólk 12–15 ára. Þar geturðu bókað tíma hjá ráðgjafa sem fer yfir vandann, veitir stuðning og ráðgjöf.

Hinsegin félagsmiðstöð

Fyrir öll ungmenni á aldrinum 13-17 ára sem vilja spjalla í félagsmiðstöð þar sem öll eru velkomin.

Heilsugæslustöðvar

Heilsugæslur eru flestar með sérstaka móttöku fyrir ungt fólk á aldrinum 13-20 ára til að ræða um heilsu og líðan.

Neyðarmóttaka fyrir þolendur kynferðisofbeldis

Stundum fer fólk sem hefur orðið fyrir kynferðisofbeldi á sérstaka móttöku á sjúkrahúsinu. Hún er kölluð neyðarmóttaka fyrir þolendur kynferðisofbeldis. Svoleiðis móttökur eru í Reykjavík og á Akureyri.

Þar talar hjúkrunarfræðingur við þig og þið ákveðið saman hvað þú vilt gera. Á neyðarmóttökunum er meðal annars:

• Veitt læknishjálp.
• Stundum eru teknar myndir svo það séu til sönnunargögn.
• Barnavernd látin vita að þú hafir mætt.

Ef þú ert í vafa hvort þú eigir að fara á neyðarmóttöku fyrir fórnarlömb kynferðisofbeldis, eða kannski heilsugæsluna, er hægt að hringja í 112 og fá leiðbeiningar.

Hér er hægt að lesa meira um móttökuna og hvað er gert í skoðun þar.

Ofbeldi á netinu

Ef einhver er að brjóta á þér á netinu er það líka alvarlegt brot. Hringdu í 112 eða notaðu netspjallið til að fá aðstoð.

Hvað gerist ef brotið er kært?

Leiðarvísirinn hér fyrir neðan útskýrir ferlið sem þú ferð í gegnum ef brotið gegn þér er kært.