Ofbeldi er alls konar
Ofbeldi getur verið líkamlegt, kynferðislegt og andlegt. Það getur líka verið stafrænt og fjárhagslegt. Ofbeldi getur gerst inni á heimilum eða úti á skólalóð, fullorðnir geta beitt unglinga ofbeldi eða unglingar hvorn annan. Ofbeldi er alls konar.
Það getur oft verið erfitt að fatta hvað sé heilbrigt eða óheilbrigt í samskiptum og hvenær það er ofbeldi. Ef einhver gerir eitt eða fleira af þessu við þig er það líklegast ofbeldi:
- Hótar þér.
- Meiðir þig með því að sparka, lemja eða hrinda.
- Missir stjórn á skapi sínu.
- Niðurlægir þig.
- Ásakar þig um eitthvað sem þú hefur ekki gert.
- Einangrar þig frá fjölskyldu eða vinum.
- Sýnir brjálæðislega afbrýðisemi.
- Skoðar símann þinn eða tölvupóst án leyfis.
- Segir þér hvað þú átt að gera eða hvernig þú átt að haga þér.
- Pressar á þig eða neyðir þig til að stunda kynlíf.
- Sendir þér óumbeðna nektarmynd eða þrýstir á þig að fá nektarmynd.
- Verslar með kortinu þínu án leyfis.
Þetta eru bara örfá dæmi. Endilega skoðaðu meira á þessari síðu til að kynna þér betur hvernig ofbeldi lýsir sér.
Segðu frá
Ef þú eða einhver sem þú þekkir hefur orðið fyrir ofbeldi er best að tala um það við einhvern sem þú treystir. Til dæmis við einhvern í fjölskyldunni, kennara, námsráðgjafa, skólasálfræðing, skólahjúkrunarfræðing eða þjálfara. Þeir sem beita ofbeldi geta líka fengið hjálp.
Það er fullt af fólki sem er tilbúið að hlusta á þig og hjálpa.
- Hjálparsími og netspjall 1717. Þar er opið allan sólarhringinn og hægt að tala í trúnaði um hvað sem er. Ekkert vandamál er of lítið eða of stórt.
- Sími og netspjall 112. Þá er fenginn ráðgjafi frá barnavernd eða félagsþjónustu sem veitir þér og fjölskyldunni þinni stuðning. Líðan barna er alltaf höfð að leiðarljósi. Aðalatriðið er að stoppa ofbeldið með því að styðja við alla aðila, hvort sem þeir verða fyrir ofbeldinu eða beita því. Það þarf að gefa upp nafn en þú getur beðið um að enginn annar fái að vita það.
- Bergið headspace. Bergið er stuðnings- og ráðgjafasetur sem aðstoðar ungt fólk og er alveg ókeypis. Þar geturðu bókað tíma hjá ráðgjafa sem fer yfir vandann, veitir stuðning og ráðgjöf.
- Vopnabúrið. Ráðgjöf og stuðningur við börn og unglinga sem glíma við einhvers konar vandamál. Í grunninn er Vopnabúrið tómstunda- og líkamsræktarstöð sem hjálpar þér að ná betra jafnvægi á skóla, heimili og félagslífi.
- Hinsegin félagsmiðstöð. Fyrir öll ungmenni á aldrinum 13-17 ára sem vilja spjalla í félagsmiðstöð þar sem öll eru velkomin.
- Heilsugæslustöðvar. Margar heilsugæslur eru með sérstaka móttöku fyrir ungt fólk á aldrinum 13-20 ára. Þú getur farið þangað til að ræða um heilsu þína og líðan.
