Alzheimersamtökin

Heilabilunarsjúkdómar hafa djúpstæð áhrif á fjölskyldulífið. Hlutverk breytast og eðli samskipta verður öðruvísi. Fólk með heilabilun og aðstandendur þeirra þurfa því oft á ráðgjöf, leiðbeiningum og stuðningi að halda.

Hægt er að panta tíma í ráðgjöf í síma 520 1082, með því að senda tölvupóst á radgjafi@alzheimer.is eða með því að fylla út form á vefsíðu samtakanna. Ráðgjöfin er öllum að kostnaðarlausu.

Ráðgjöfin fer fram á skrifstofu samtakanna í Hafnarfirði, í fjarfundi eða í gegnum síma svo öll geta nýtt sér þessa þjónustu óháð búsetu.

Þá skiptir ekki máli hvar í ferlinu einstaklingur eða fjölskylda er stödd þegar pantað er viðtal. Fagfólk eða einfaldlega aðilar sem vilja vita meira um málefnið geta líka fengið ráðgjöf.

Vefur Alzheimersamtakanna
Á vef samtakanna alzheimer.is má finna upplýsingar sem tengjast heilabilun t.d. um greiningarferlið og ýmsa fræðslu.

Fræðsla á vegum samtakanna
Samtökin halda reglulega fræðslufundi um efni sem tengist heilabilun í Lífsgæðasetrinu í Hafnarfirði. Þeir sem komast ekki á staðinn geta horft á upptökur á vefnum okkar alzheimer.is en þar eru allir fræðslufundir líka auglýstir á viðburðasíðu.

Stuðningshópar
Stuðningshópar eru ætlaðir aðstandendum og byggjast á hugmyndafræði jafningjastuðnings og er markmiðið með samverunni að hittast, spjalla og deila reynslu. Stuðningur annarra í svipuðum aðstæðum getur bætt líðan og dregið úr streitu. Nálgast má frekari upplýsingar um tímasetningar á alzheimer.is

Sálfræðiþjónusta
Ýmsar tilfinningar geta komið upp hjá fólki sem greinist með heilabilun og aðstandendum þeirra. Það getur verið gott að ræða þessar tilfinningar við fagfólk og fá aðstoð við að finna og nýta styrkleika sína í nýjum aðstæðum.

Félagsmenn Alzheimersamtakanna geta pantað viðtal við sálfræðing í síma 533 1088 eða með því að senda tölvupóst á alzheimer@alzheimer.is. Viðtalið kostar 5.000 kr.