Beint í efni

Undirbúningur sem styrkir þolendur

Þegar þolendur ofbeldis mæta í dómsal til að bera vitni þurfa þeir að rifja upp erfiða lífsreynslu. Það er því mjög gott að geta æft framburð og gengið í gegnum þau líkamlegu óþægindi sem oft hellast yfir fólk í þessum aðstæðum. Að upplifa ferlið getur einnig hjálpað þolendum ofbeldis við að taka ákvörðun um hvort kæra skuli eða ekki.

Aðstaða fyrir sýndardómsalinn er hjá Ríkislögreglustjóra við Skúlagötu 21 við Hlemm. Sýndardómsalurinn er opinn fyrir alla hlutaðeigendur í ofbeldismálum en greiða þarf fyrir þjónustuna. Sérstakt opnunarverð er 5.000 kr fyrir staka heimsókn, en mælt er með að fara eigi sjaldnar en í þrjú skipti, fyrir alls 12.000 kr. Ef ekki er komið með fagaðila í sýndardómsalinn, þá er fagaðili frá Statum eða Ríkislögreglustjóra á staðnum.

Upplifun sýndardómsals

Í sýndardómsalnum er sérstakt herbergi með stól og borði sem notandinn sest við áður en sýndarveruleikagleraugun eru sett upp. Þegar manneskja setur upp gleraugun, þá er hún stödd í dyrunum á dómsalnum og gengur með þau á sér að vitnastúkunni og sest niður. Þar er hún um leið komin inn í nákvæma eftirlíkingu raunverulega dómsalsins sem er oftast notaður í kynferðisbrotamálum í Reykjavík.

Sýndarverur sitja í salnum og eru í hlutverki réttargæslumanns, ákærða, dómara og fleiri aðila sem yfirleitt koma að málinu. Sýndarverurnar bregðast við því sem er að gerast í dómsalnum í gegnum allt ferlið. Viðkomandi sest í vitnastúkuna og getur æft sig í raunverulegum aðstæðum.

Þróun verkefnisins

Fyrirtækið Statum hannaði og þróaði sýndardómsalinn. Upphafið má rekja til nemendaverkefnis í tölvunarfræði við Háskólann í Reykjavík. Í framhaldi hafa verið gerðar rannsóknir innan sálfræðideildar háskólans sem sýnt hafa fram á greinilegan ávinning af honum fyrir líðan þolenda.