Leiðarvísir um fyrir þolendur kynferðisbrota (18 ára og eldri)

Ég hef orðið fyrir kynferðisofbeldi, hvað á ég að gera?

Hafðu samband við 112 hvenær sem er til að fá aðstoð. Þú getur farið á neyðarmóttöku fyrir þolendur kynferðisofbeldis ef brotið er nýafstaðið. Þú getur líka farið á heilsugæsluna þar sem þú býrð.

Hafðu samband við fagfólk eins fljótt og þú getur. Það er mjög mikilvægt að vinna úr áfallinu sem þú hefur orðið fyrir.

• Sjá leiðarvísi fyrir 15-17 ára.
• Sjá leiðarvísi fyrir 14 ára og yngri.

Að fá aðstoð

Mundu: Það er alltaf hægt að leita til Neyðarlínunnar. Það er hægt að hringja í 112 eða taka þátt í netspjalli.

• Allir geta lent í ofbeldi og því þarf enginn að skammast sín fyrir það.
• Að segja frá því sem þú ert að ganga í gegnum getur hjálpað þér að hugsa skýrar um stöðuna. Það hjálpar líka oftast strax að vita að maður er ekki einn og getur fengið hjálp.
• Það skiptir ekki máli hvort þú sért enn í tengslum við gerandann. Það er aldrei of seint að fá aðstoð.

Heilbrigðisstofnanir

Ef þú verður fyrir kynferðisofbeldi er gott að fara sem fyrst á Neyðarmóttöku vegna kynferðisofbeldis eða á Heilsugæslu til að fá aðstoð. Þar geturðu fengið áverkavottorð sem hægt er nýta ef þú ákveður að kæra.

Lögreglan

Tilkynningar sem lögreglan fær eru alltaf skráðar niður sem getur hjálpað í framtíðinni þó að þú sért ekki tilbúin að leggja fram kæru strax.

Stígamót

Þú getur alltaf haft samband við Stígamót sem sérhæfa sig í að hjálpa fólki sem hefur orðið fyrir kynferðislegu ofbeldi. Engu máli skiptir hversu langt er síðan ofbeldið átti sér stað.

Þolendamiðstöðvar

Þolendamiðstöðvar veita áfallamiðaða ráðgjöf, stuðning og upplýsingar um bataferlið og réttarkerfið. Þú getur talað við lögreglu, lögfræðing og önnur hjálparsamtök á staðnum. Þjónustan er fyrir þolendur ofbeldis af öllum kynjum og er ókeypis.

1700 og 1717

Hjúkrunarfræðingar hjá 1700 geta veitt góða ráðgjöf vegna kynferðisofbeldis.

Börn og fullorðnir geta alltaf talað við einhvern hjá 1717 (hjálparsíma Rauða krossins) og svo er hægt að hafa samband við 112 gegnum síma eða netspjall.

Leiðarvísir um réttarkerfið

Í þessum leiðarvísi er reynt að útskýra sem best ferlið sem fer í gang við kæru og við hverju þú mátt búast. Honum er ætlað að skýra ferlið vegna brota á einstaklingum eldri en 18 ára.

Hvað gerist þegar ég kæri?

Ef þú ákveður að kæra til lögreglu fer málið eftir ákveðnu ferli í gegnum réttarkerfið. Þetta ferli getur verið erfitt og tekur langan tíma. Þetta er samt eina leiðin til að láta gerandann svara til saka.

Hvað gerist þegar ég kæri?

Ef þú ákveður að kæra til lögreglu fer málið eftir ákveðnu ferli í gegnum réttarkerfið. Þetta ferli getur verið erfitt og tekur langan tíma. Þetta er samt eina leiðin til að láta gerandann svara til saka.

Hvað er réttarkerfið?

Réttarkerfið er samheiti yfir lögreglu og dómstóla. Ef þú ákveður að kæra taka lögreglan og dómstólar við málinu.