Beint í efni

Stjórnun gegnum fjármál

Enginn hefur rétt á að nota þína peninga eða stjórna því hvernig þú notar þá. Fjárhagslegt ofbeldi er notað til að stjórna manneskju gegnum fjármál. Það getur til dæmis verið með því að ákveða hvað þú mátt og mátt ekki kaupa, neita þér um að fá peningana þína eða svíkja af þér peninga.

Sá sem verður fyrir fjárhagslegu ofbeldi getur einangrast og misst sjálfstæði sitt. Þar sem maður verður fjárhagslega háður þeim sem beitir ofbeldinu getur verið mjög erfitt að slíta sambandinu.

Það er fjárhagslegt ofbeldi ef viðkomandi:

  • Gefur þér vasapening og fylgist ítarlega með því hvað þú kaupir.
  • Millifærir launin þín inn á sinn bankareikning og neitar þér um aðgang.
  • Kemur í veg fyrir að þú sjáir upplýsingar um sameiginlega bankareikninga.
  • Bannar þér að vinna eða takmarkar vinnutíma þinn.
  • Notar sameiginlega fjármuni ykkar í óþarfa, án leyfis.
  • Notar peninga til að stjórna þér, af því þú átt lítið af þeim.
  • Skráir þig fyrir sameiginlegum skuldum ykkar.
  • Verslar með kortinu þínu, án leyfis.
  • Tekur lán í þínu nafni, án leyfis.

Það er alltaf betra að segja einhverjum frá hvernig þér líður. Ef þú vilt fá aðstoð getur þú haft samband við Bjarkarhlíð í Reykjavík eða Bjarmahlíð á Akureyri sem sérhæfa sig í stuðningi fyrir fullorðna við hvers konar ofbeldi. Engu máli skiptir hversu langt er síðan ofbeldið átti sér stað.

Börn og fullorðnir geta alltaf talað við einhvern hjá 1717 (hjálparsíma Rauða krossins) eða haft samband við 112 gegnum síma eða netspjall.

Þekkir þú birtingarmyndir ofbeldis?

Skoða fleiri dæmi

Ólafur

Ólafur er nægjusamur maður á áttræðisaldri sem býr á eigin heimili. Eitt barnabarna hans, Hrafnhildur, hjálpar honum oft við hluti sem eru honum erfiðir, eins og að fara út í búð og borga reikninga. Ólafur lét Hrafnhildi fá aðgang að netbankanum sínum í þessum tilgangi.

Nokkrum mánuðum seinna þegar Ólafur ætlaði að kaupa sér nýjan sófa kom í ljós að Hrafnhildur hafði millifært reglulega af reikningnum hans yfir á sig.

Er þetta ofbeldi?

Bjarmahlíð á Akureyri

Bjarmahlíð veitir fólki sem hefur orðið fyrir ofbeldi stuðning og ráðgjöf í hlýlegu umhverfi. Þar geturðu fengið alla aðstoð á einum stað, eins og frá lögreglu, lögfræðingi og öðrum hjálparsamtökum.

Bjarkarhlíð

Bjarkarhlíð veitir fólki sem hefur orðið fyrir ofbeldi stuðning og ráðgjöf í hlýlegu umhverfi. Þar geturðu fengið alla aðstoð á einum stað, eins og frá lögreglu, lögfræðingi og öðrum hjálparsamtökum.

Kvennaathvarfið í Reykjavík

Kvennaathvarfið býður upp á ráðgjöf og húsnæði fyrir allar konur sem hafa orðið fyrir ofbeldi.