Nektarmyndir og stafrænt kynferðisofbeldi gegn börnum

Kynferðisofbeldi á netinu og síma

Líkamshlutar sem eru á miðjum líkamanum og tengjast kynlífi og að eignast börn kallast kynfæri.

Þau eru ekkert til að skammast sín fyrir en við viljum samt ekki sýna þau hverjum sem er. Þau eru okkar einkamál.

Mundu:

• Það má ekki taka kynferðislega mynd af börnum undir 15 ára.
• Það má ekki senda neinum undir 15 ára mynd af kynfærum.
• Það má aldrei senda mynd af kynfærum nema það sé búið að fá samþykki, þótt það séu tveir fullorðnir.
• Fullorðnir mega ekki senda börnum textaskilaboð sem eru kynferðisleg.
• Það má ekki deila kynferðislegri mynd af öðrum eða hóta að gera það.

Þetta er allt bannað og ólöglegt og á ekki að gerast.

Hvað á ég að gera?

1. Haltu ró. Mundu að það er aðstoð í boði.
2. Talaðu við einhvern fullorðinn sem þú treystir. Það getur verið foreldri, kennari, námsráðgjafi, starfsmaður á félagsmiðstöð eða hver sem er.
3. Fáðu hjálp. Þú getur farið á síðuna TakeItDown ef efnið eru í dreifingu. Ef efnið er á samfélagsmiðlum, tilkynntu það (reporta) og fáðu trausta vini til að gera það líka.
4. Fáðu meiri aðstoð. Ef þú ert í vafa með hvað þú átt að gera geturðu fengið ráð hjá skólanum, 1717, Sjúkt Spjall eða lögreglunni. Hægt er að panta tíma í kærumóttöku hjá lögreglunni á vefnum þeirra.

Tæling

Það getur gerst að einhver fullorðinn þykist vera unglingur á netinu til að fá barn til að gera eitthvað kynferðislegt, eins og að senda nektarmynd af sér. Stundum býður hann gjafir eða peninga í staðinn, eða hrósar rosalega mikið. Þetta kallast tæling og er ólöglegt.