Mansal er þegar einstaklingur misnotar eða hagnýtir aðra manneskju á einhvern hátt til að græða peninga eða fá önnur hlunnindi.
Mansal er glæpastarfsemi þar sem verslað er með manneskjur. Oft eru vonir og draumar fólks um betra líf notaðar og fólk þvingað til að lifa lífi sem það bað ekki um.
Mansal birtist á marga vegu. Sumir halda að mansal sé bara vændi og að bara konur geti orðið fyrir því en það er ekki rétt. Þolendur mansals koma oft úr viðkvæmum hópum, til dæmis fólk á flótta eða í leit að betra lífi, fátækt fólk, fólk í neyslu, heimilislaus ungmenni og börn.
Neyðarvörður er hlutlaus aðili sem aðstoðar þig ef þú hefur vitneskju um mansal. Hafðu samband núna.
Gerandinn getur verið hver sem er, einhver sem lætur eins og vinur þinn, yfirmaður, fjölskyldumeðlimur eða jafnvel maki. Fólk er tælt með ást, umhyggju, athygli eða öryggi til þess að mynda traust. Þú veist ekki endilega að það sé verið að misnota þig og að þú sért þolandi mansals.
Ef þú þekkir einkenni og aðferðir við mansal og veist hvert á að leita til að fá hjálp, þá eykur þú líkurnar á að uppræta það.
Fólk af erlendum uppruna sem býr á Íslandi er í meiri áhættu á að verða fyrir ofbeldi.
