Beint í efni

Kynferðisleg þvingun eða áreiti

Ef einhver þvingar þig til að gera eitthvað kynferðislegt er það kynferðisofbeldi. Það getur til dæmis verið kynmök, innsetning eða snerting á líkamshluta. Ef einhver áreitir þig kynferðislega með orðum eða snertingu er það líka kynferðisofbeldi. Það skiptir engu þótt sá sem beitir ofbeldinu sé maki þinn. Flestir sem verða fyrir kynferðislegu ofbeldi þekkja þann sem beitti því.

Kynferðisofbeldi getur leitt til áfallastreituröskunar, kvíða og þunglyndis. Fólk sem verður fyrir kynferðisofbeldi er líklegra til að finna fyrir skömm, sektarkennd, reiði, ótta, einangrun og lélegri sjálfsmynd. Stundum koma afleiðingar fram strax en stundum ekki fyrr en síðar.

Dæmi um kynferðisofbeldi er:

  • Kossar eða snerting gegn vilja þínum.
  • Kynferðisleg orð eða látbragð gegn vilja þínum.
  • Kynlíf þegar þú getur ekki sagt nei. Til dæmis af því að þú ert undir áhrifum eða sofandi.
  • Að neita að nota smokk eða taka hann af án þess að láta þig vita.
  • Að hæðast að þér eða ógna ef þú vilt ekki gera eitthvað tengt kynlífi. Til dæmis að horfa á klám eða bjóða öðrum með.
  • Að hóta að sýna öðrum nektar- eða kynlífsmyndir af þér.
  • Að þrýsta á þig að senda sér nektarmyndir af þér.
  • Að senda nektarmyndir til þín þótt þú viljir það ekki.
  • Nauðgun eða tilraun til nauðgunar.

Ef þú verður fyrir kynferðisofbeldi er gott að fara sem fyrst á bráðamóttökuna til að fá aðstoð. Þar geturðu fengið áverkavottorð sem hægt er nýta ef þú ákveður að kæra. Þú getur líka haft samband við Stígamót sem sérhæfa sig í að hjálpa fólki sem hefur orðið fyrir kynferðislegu ofbeldi. Engu máli skiptir hversu langt er síðan ofbeldið átti sér stað.

Börn og fullorðnir geta alltaf talað við einhvern hjá 1717 (hjálparsíma Rauða krossins) eða haft samband við 112 gegnum síma eða netspjall.

Afleiðingar og bætt líðan

Fólk sem hefur leitað til Stígamóta segir frá því hvernig því leið eftir kynferðisofbeldi og hvernig því líður betur í dag eftir að hafa leitað sér hjálpar.

Þeir sem beita kynferðisofbeldi

Þeir sem beita ofbeldi eru oftast nær „venjulegir“ menn. Hér lýsa þolendur ofbeldismönnum sínum.

Þekkir þú birtingarmyndir ofbeldis?

Skoða fleiri dæmi

Lára

Á fyrstu mánuðum sambandsins fannst Láru aðdáunarvert og sexý hversu auðvelt var að tala við Þránd um kynlíf. En með tímanum virtist þörf hans fyrir að ræða og stunda kynlíf bara aukast og henni fór að finnast það óþægilegt. Sérstaklega þegar hann sagði henni frá nauðgunarfantasíu sem hann var með.

Eina nóttina vaknar Lára upp við að Þrándur er að stunda mök með henni. Hún veit ekki hvað hún á að gera svo hún gerir ekki neitt. Eftir á þakkar Þrándur henni, snýr sér á hina hliðina og sofnar.

Er þetta ofbeldi?

Stígamót

Stígamót hjálpa öllum (konum, körlum og kynsegin fólki) sem hafa orðið fyrir kynferðislegu ofbeldi.

Neyðarmóttaka vegna kynferðisofbeldis

Neyðarmóttakan tekur á móti öllum þeim sem hafa orðið fyrir nauðgun, tilraun til nauðgunar eða öðru kynferðisofbeldi.

Bjarkarhlíð

Bjarkarhlíð veitir fólki sem hefur orðið fyrir ofbeldi og þolendum mansals stuðning og ráðgjöf í hlýlegu umhverfi. Þar geturðu fengið alla aðstoð á einum stað, eins og frá lögreglu, lögfræðingi og öðrum hjálparsamtökum.